تاريخ سوره سينده آذربايجان قادينلاري ايستر اؤز ارلري ايله، ايسترسه ده اؤزلوكلرينده قانلي - قادالي دؤيوش مئيدانلاريندا، بول - بول حماسه لرين ياراديجيلاري اولموشلار كي، تاريخ صحيفه لريميز بونلارين بير سيراسينا اؤز سينه سينده اؤيونه، اؤيونه يئر وئرميشدير. بو تورپاقدا اولدوقجا قادينلارا حؤرمت گؤزو ايله باخيلميش و بير سيرا يابانجيلار كي، قاديني نفر واحيدي ايله اؤلچوب و «زن و اژدها هر دو در خاك به» دئميشلر، باخيلماميشدير. زنگين و بير چوخ حيصصه لري قيزيل قانلا يازيلميش تاريخيميزده قادينلارين روللاري بعضي يئرلرده كيشيلردن آز اولماميش و بوتون ساحه لرده گاهدان قاباقجيل دا اولموشلار. اؤرنگ اولسون دئيه دؤيوش مئيدانلاريندا بابكين حايات يولداشي كلدانييه، كوراوغلونون نيگاري و نبي نين هجري اونلارلا بيرگه دؤيوشلرده ظفرلر قازانميشلار. تانباكي حركاتيندا هله ده آدي چوخ حؤرمتله ياد اولان زئينب پاشا، اؤز قهرمان يار يولداشلاري ايله خالقين دار گونونده ياغيلارين باشينا نه اودلار تؤكموشلر. شاعير ز-اميرلو دؤيوشچو قادينلاريميزن پايين آشاغيداكي شعرده گؤزه ل و لاييقينجه تصويره چكميشدير:

اسكي زمانلاردان بيزيم ائللرده قادينلارا بوللو، حؤرمت وارايميش
آنايا، گلينه، قيزا هر زامان توكه نمز ده يرلر، عيززت وار ايميش
تاريخ بويو اولو آتا باباميز آنا ايله تانريني، حاقلي بيلميشلر
بير تانري اؤنونده اييليب، داها آنالار اؤنونده، بير اييلميشلر
ازلدن ديللرده مثل اولموش كي:«آسلانين اركه يي، ديشيسي اولماز»
دئييبلر قادينا ده ير وئرمه سك ميللتين ده يرلي كيشيسي اولماز
اوندا كي باشقالار، قيز اوشاقلارين ديري، ديري تورپاق آلتدا قويلارميش
هامان چاغدا بيزيم ائل اوباميزدا بخت اولدوزو، آتا قيزين سانارميش
اوندا كي باشقالار، آروادي قيزي ساتيرديلار قول تك، پولا بازاردا
ياشاياردي آزاد بيزيم آروادلار ديز به ديز شرفله، ان ايفتيخارلا
تاريخلرده پارلاق بير اولدوز كيمي تومروس آناميزين، آدي قالميشدير
او تومروس كي تبريز، آنا وطنيم ايفتيخارلي آدين اوندان آلميشدير
كوراوغلو نبي يه، سس ووروب سسلر نيگارلار، هجرلر، زينب پاشالار
بوردا زنانلار دا كيشيلر كيمي ايستيبداد كؤكسونه سونگولر چالارلار
هونر عالمينده داييم پارلاييب يوزلرجه مه هستي، يوزلرجه پروين
نه گؤزل اثرلر ياراديب بونلار ظاهيري ساپ - ساده معناسي درين
آزاده كيشيلر - آزاد قادينلار ياشاديب ياشاسين آذربايجانيم
اودلار، ديياريسان، شرف يوردوسان سن كيمي آنايا، قورباندير جانيم.

تئللي زري خانيم

اوست سطيرلرده دئديييميز كيمي بيزيم تاريخ، جومورودلردن دالغالانير. ايندي بورادا اونلارين بير باشقاسيندان دا آد چكمك ايسترديم. بو جسارتلي قادين «تئللي زري» اولموشدور كي، مشروطه اينقيلابيندا اوغلانلارلا بيرگه دؤيوش سنگرلرينده ياغيلارين علئيهينه موباريزه آپاريردي كي، ظاليملرين ميراث گولله لرينه توش گلير. باشقا موجاهيدلر بو جنگ پالتار گئين دؤيوشچونو دينج بير يئره آپاريب اونون يارالارينا داوا - درمان ائتمه قرارينا گليب، اونون حرب گئييملرين چيخارداندا مانئع اولوب و ايسته يير كي ستتارخان گرك بورادا اولسون. بو خبري قوچاقلار ستتارخانا يئتيرجك هامان، ستتارخان او دؤيوشچونون سون چاغلاريندا باشي اوستونه يئتيشمك همان اولور. شاعير محمد ابراهيم زاده «دنيز» بو دستاني گؤزلجه نظمه چكميشلر. بونو دا قئيد ائتمك يئرسيز اولماز كي، همين داستانلا، ماراقلانانلاردان بيريسي ده ائل و خالقين شاعيري سؤهراب طاهيردير. سؤهراب موعللمين بو شئعري بير نئچه دؤنه چاپ اولدوغونا گؤره اوندان واز كئچيب، محمد دنيزين شئعرين بيرگه اوخوياق:

كؤنلوم يئنه بير ايز آييرير دويغو تئليندن
ايستر يئني بير صحبت آچا آذر ائليندن
سؤز باشلاياراق بير دؤنه تبريز شهريندن
مشروطه ديلاورلرينين بول هونريندن
مشروطه ده بير قيز گئيينيب جنگ ليباسين
قانلا بوياييب اللرينه الوان حناسين
تومروس ساياغي ايلهام آليب اؤز ديياريندان
تا وار نفسي ائتدي ديفاع ناموس - عاريندان
گؤلله ده يره ك، سينه سينه قاني جالاندي
يالنيز يادا باش ايمه يه ره ك سرت يارالاندي
ائللر قوچاغين تئز گؤتوروبلر ائوه ساري
ملحم قويالار يارهسينه ائتمه يه زاري
هر نئتديلر، او قويمادي سويسونلا ليباسين
تا ياره سينين اؤستونه قويسونلا داواسين
ستتارخان او دم تئز يئتييشيب سؤيله دي اوغلوم
آي ويجداني پاك قلبي تميز نيييتي دوغروم
عيللت نه دي كي قويموسان ائتسينله طبابت
آيا بو ايشه واردير الينده يئني عيللت؟
او ائل بالاسي اوز توتاراق سؤيله دي سردار
تئز سن بوراني خلوت ائله سنله سؤزوم وار
ستتارخان او حال خلوت ائديب تئز او مكاني
اوز توتدو اوغول وار نه سؤزون سؤيله بو آني
اوول يارهلي عسگر دئدي ائل اولدوزويام من
اوغلان دئييلم ائل بالاسي ائل قيزييام من
ستتارخان ائشيت جك بو سؤزو بير حالا قالدي
رنگي ساراليب تئز قيزين آدين خبر آلدي
«آدين نه دير آي ائل قوچاغي قلبيمي دلدين
من كي ديرييم اؤلمه ميشم سن نييه گلدين؟
تئللي زري سسلندي وطن عسگرييم من
اوغلان دئييلم تورك قيزي، تئللي زرييم من
تئللي زرينين سردار ائله كي سوروب حالين
چيخدي ائشييه سسله دي فورن اؤز عيالين
سسلندي قادين گل بو قيزين باغلا ياراسين
چوخ سعي ائله قويما اؤله بو خالق بالاسين
تا اؤ يئتيشسينجه زري آراميني آلدي
آذر ائليني مين كدهره مين اودا سالدي
جوت گؤزلري اولدوز تك آخيب گول كيمي سولدو
بيرليك سؤزونو خالقا دئييب سونرا اؤلوبدو
ائل آشيغي چال منصوري غملر تزه لندي
آذر بالاسي تئللي زري قانه به لندي
چالخاندي «دنيز» قان دولوسو اولدو بو چوللر
مينلر قوچاغين قاره ساچين هؤردو بو ائللر

بايرامقولو قيزي سرييه خانيم

هله 21 آذر جريانيندا اردبيلدن قالخان و ايستيبداد علئيهينه قهرمانجا موباريزه آپاران بايرام قولو قيزي سرييه خانيمي، گؤرنلر، اونون جسارت و شهامتيندن سؤز -صؤحبت آچاندا، سانكي ايكينجي زئينب پاشادير ذيكر ائتميشلر. بو جسارتلي و تاسسوفله آدي ايتگين قالان قادين تكينه 5 گون دوشمنين موحاصيره سينده قالديقدا يئنه ال - قولو سووومادان سون گؤلله يه قدر آتيشميش آنجاق نه ايسه ياغيلارين يالانلاري و ياغلي ديللرينه اينانيب سنگردن چيخديقدا، نامردجه سينه اونو قتلگاها گؤنده ريب گؤلله ده مينه وئرنده جللادلارا دئيير: تاريخ سيزلره نيفرين ائدهجك، قاتيللره نجات يولو باغليدير. آذربايجانين رشيد بالالاري منيم اينتقاميمي سيزدن آلاجاقلار. آذربايجان آزاد اولاجاق».

«آزادليق يولوندا مبارزه» كيتابيندا بو قادينا عاييد آشاغيدا كي سطيرلر قئيد ائديلميشدير:«خلق آزادليغينين كئشيگينده مردليكله دايانان اؤز عينادچيليغىيلا دوشمني حئيرته سالان ايگيد ثومرين اوغوللاري ايچريسنده آذربايجان خلقينين قهرمان قيزي سرييه ده ووروشوردو. او، حيات يولداشي علي ايله بيرليكده، اونونلا چييين - چييينه بير سنگردن آتش آچيردي. لاكين او، هم موحاصيره ده، هم ده فيشنگي قورتاماقدا ايدي. بونا باخماياراق او، دوشمنه تسليم اولماق ايسته ميردي. خايين دوشمن ثومرين فداييلرينين، ائلهجه ده سرييه خانيمين قارشيسينا قورآن گتيرير، اونا ال باسير، آند ايچير «شرفله» سؤز وئرير و حاكيم طبقه لرين يوز دفعه لرله ال آتديقلاري آلچاق حيله و آلداتما مئتودوندان ايستيفاده ائدير. آز سونرا قورآنا باسيلميش اللر ثومرين فداييلرينين، او جومله دن شاهسئون ائللرينين قهرمان قيزي سرييه نين قانىيله بويانير. قهرمان فدايي سرييه اؤلدورولمه ميشدن اوول بارماغيني جللادلارين گؤزونون ايچينه سيلكه له يه ره ك «بو سيزين اوچون هونر دئييل، تاريخ عهد و پئيمان پوزانلاري نيفرتله ياد ائده جكدير»! دئميشدير. او سؤزونو دوام ائتديره ره ك اوجا سسله بئله علاوه ائتميشدير: «آذربايجانين ايگيد اوغوللاري منيم قانيمي يئرده قويماياجاقدير! شهيدلر قاني آزادليق آغاجين سوواراجاق» بو نزاكتلي و شرافتلي قادين «اردبيلين ثومرين قصبه سينده 1325 ينجي ايلين آذر آيينين 26 ينجي گؤنو ناهاردان سونرا ساهات 6 دا بير ده ييرمانين قيراغيندا تاسسوفله شهيد اولونموشدور» و بئله ليك له «18 نفر فدايي ايله شاهسئون قيزي سرييه، خانلارين سيلاحلي دسته لرينه 5 گون موقاويمت گؤستريب اؤلومو مردليكله قبول ائتديلر.» يازيقلار اولسون كي بو رشيد و ديلاور قاديندان تاريخلري آراييب، آختاراندا بير شئي گؤزه ده يمير. البتته بونون اساس عاميلي بو اولابيلر كي، ميللي حوكومت دئوريلنده ن سونرا، اوندان يازماق نئجه دئييرلر گوج آپاران ايشلردن ايدي و سونرالاردا او دؤورون آداملاري قيريليب قورتولدوقدا ايش داهاچتينلشميشدير. بئله ليك له سرييه خانيم دا اؤزوندن قاباق ظولم و ظاليم علئيهينه موباريزه آپاران موباريزلر كيمي تاريخه قوووشدو و اؤز گؤستردييي شرافت و شوجاعتي ايله تاريخيميزين بزكليلريندن بيريسي اولور. نئجه كي زئينب پاشا، هجر خانيم، آتلي شاه به ييم، تئللي زري، عظمت خانيم، پروين اعتصامي، گنجه لي مه ستي، نيگار خانيم، خورشيد خانيم و... اولموشلار. يازيميزين سونوندا اوستاد حميد سخامئهرين منيم خواهيشيمله يازديغي «آسلان سرييه» باشليقلي شئعرين بيرگه اوخوياق:

گؤردو اؤز يوردون٫ ائلين زار و پريشان سرييه
غئيرتي چكمه دي گؤرسون ائله نالان سرييه
ظاليمين بلكه توفنگيله سؤكه سينه سيني
ويجدانيله اؤز آرا باغلادي پئيمان سرييه
ائتمه يه جنگ فيشنگيله توفنگين گؤتوروب
مرد-ى مردانه اولوب عازم-ى مئيدان سرييه
عرصه تنگ اولدوغو حالدا آتيشيب دوشمنيله
دوشمنين باغريني بئش گون ائله ييب قان سرييه
تا فيشنگي واريميش سنگريني بوشلاماييب
صوولتيله ائله ييب دوشمني حئيران سرييه
چوخ دؤيوشدن سورا آخيرده فيشنگي قوتاريب
ائله ييب جانين آذربايجانا قوربان سرييه
(توپراق آلتيندا زن و اژدهاني قويلويانا)*
كيشيليك رسمين ائديب اوندا نومايان سرييه
قوربانام منده «سخا» سرييه كيمي قهرمانا
كيشيدن ده باشيميش چونكو او اينسان سرييه
آسلان آسلاندي دئييبلر اولماز اركك يا ديشي
يئري واردير اونا تاريخ دئيه آسلان سرييه

قايناقلار و ايضاحلار
1- "آزادليق يولوندا مبارزه"، بيرينجي جيلد، ص 19
2- "مهد آزادي" گؤنده لييي، شاعير ز-اميرلو- نون شئعري همين گؤنده ليك دن گؤتورولموشدو.
3- حؤرمتلي شاعير محمد دنيزدن شئعرين بيزيم ايختياريميزدا قويدوقلارينا گؤره اؤز ميننتدارليغيميزي بيلديريريك.
4- "از زندان رضاخان تا صدر فرقه دمكرات آذربايجان"، علي مرادي مراغه اي، باهار 1382، تهران، اوحدي، ص 516
5- سالماسلي عاليم دوستوم حؤرمتلي علي اصغرغفورينيا جنابلارينين، لطفعلي اردبيلي (فلكي)نين سرييه خانيم حاققيندا ايكي سطيرليك يازيسين بيزه لوطف ائتديكلرينه گؤره تشكور ائديريك.
6- "گذشته چراغ راه آينده است". پژوهش گروهي: جامي، ويراستار: بيژن نيك بين، چاپ دوم پاييز1371 - تهران نشر نيلوفر.
* - "زن و اژدها هردو در خاك به- جهان پاك از اين هر دو ناپاك به"حكيم فردوسي طوسي، ايرانين آدليم شاعيري.