سن یوخسان
لیلا حیدری،
قادینلیق قورتولوشو
و آزادلیق اوغروندا دوستاقلاردا چیرپینان ماراللارا سونولور.
سن یوخسان
محمد رضا لوائی
دنیز نه دیر؟
- اؤلوم تری!
هانسی شئرین قورخاق ایزلری ایمیش
كؤرهییمین مؤهرهلری؟
سن یوخسان
شهر تمیزلنیر عصمتینده
كیشیلر سنگر توتوبلار غیرتینده
هئی، قادینلیغین سون نفسی
كیشیلییمیزین سسی
بو تئروریست كؤلگهلر ده
یاندیردیغیم سیگارا
سنین دردیندیر
سنی باغیریر هانسی قورشون؟
هانسی سیلله؟
هانسی سوكوت؟
تبریزی گؤز یاشلاریمدان آل گؤتور «ائوین»ـه
اوهوی ی ی دلی بولوت!
گؤزلرین،
تومروسون یولودور
گؤزلرینی بیزه آز گؤرمه
داملا، دنیزدن دولودور
سن یوخسان لئیلا
مجنونلوق تؤكولور دام-دوواردان
سن یوخسان آمما
یئنی ماهنین دووارلارا یاپیشدیریلیر
لئیلیم لئی ی ی... لئیلیم لئیی ی ی ی
لئیلیم لئی
اؤز «اِوین»ده اوتوروب،
بیزی زیندانلارا قیشقیران گلین باجیم
«لئیلی حیدری»نین گؤیسل دویغولارینا...
لئیلیملئی... لئیلیملئی... لئیلیملئی...
سعید موغانلی
آه ائی...
لئیلی...
لئیلی...
لئیلی...
سنین آدینلا تانینیر اوزئییر حاجیبَیلی...
آدینلا اؤیونور شعر. آدینلا سئویشیر فضولی بابام. آدین نظامیلرین چیبان گؤینرتیسیدیر، آدین نیظامینین آپاق سئوگیسی. آدین واحیدلرین چاخیر مزهسی:
«دئمه مجنونا دلی بلکه ده لیلا دلیدیر/ عشق اولان یئرده بوتون عاقل و دانا دلیدیر».
دوه کروانلارینین زینقرو سسی گلیرکن، آدینلا گؤزلره سوخولورام سئوگی مئساژلاری کیمی. ایندی کی آدینلا اؤیونمهلی اولدولار سیبریدن خزره، زنگاندان عرب کورفزینه داغیلان میللتیمیز. قوی آدینی قیشقیریم شاه باباما... ختایی دیوانینا بیر بؤلوم آرتیرمالی اولدو دئیهسن.
دردیندن مات قالان فضولی بابام، دئپرس اولوب، شیزوفرنی توتوب. چاغیمیزین لئیلیسی دوستاقدا ایکن...
قوی آدینی سسلهییم. قوی آدینلا سسلهنیم. آدینلا اؤیونوم. آدینلا آد آلیم. شعر اولوم و اؤلوم...
و سن نازلی باجیم، لئچهیینی منه پای گؤندر، قارداشلیق انگینلییینده اولان کیشی سؤزجویو سویا گئتمهکدهدیر. بیر کامیون کالایغی لازیمدیر ساعات قاباغیندان ارکین کیشیلییینه چاتانا کیمی... و قورخوموزو شعره بوشالتماغا بیر قیرمیزی خودکار...
گؤندَریرم. SMS آدینی بؤیوک حرفلرله
LEYLI… LEYLI… LEYLI.…
ایندی کی بیر امضا وورماغا گوجوم چاتیر تکجه. ایندی کی قورخا-قورخا یازیرام سعید موغانلیلیغی... گؤر سن نئجه بیر قوردسان، تک باشینا اولاییرسان مملکتیمیزی، قوردلوغوموزو و اؤزگورلویوموزو...
باخ آنا تبریزله سایین زنگان اوتوبانی دا سنین عشقیندن باشینی دیک توتا بیلیر. دیم-دیک دایانیر ستارخان سنگری ارک و پیشهوری بابانین قانون ائوی ساعات سارایی... تکی سن یاشا، زنگانیمیزین قیز اوغلو... دیک توت باشینی قارامان قورد. باغیر حاققیمیزی ناخجیواندان خوزستانا کیمی، آغریدان دماونده کیمی، ساوادان ساوالانا، هورانددان خوراسانا، سویوقبولاقدان ساووجبولاغا... سپهلنمیش چینار کؤتوکلرینه و قرنفیل ائلچیبَیلییینه...
آدینی گؤندَریرم بوتون گولـلهلره، بوتون گوللره. گول باجیم، گولتاجیم. گول قوی من اوتانجدان جان وئریم. گول ده قوی کوراوغلو کیشیلیییمیزه گولسون و امیرتئیمور بیر داها قران دوداغیندا جان وئرسین... ایندی کی، ایگیدلییین معناسی سنسن...
بو گونلر سن قالدیغین ائوینده، سن یاتدیغین سللولدا یاشاییم دئیه، بؤیروم اوسته یاتیرام گئجهلری قوجونمادان. چیرکلی موکتلری اییلهییرم. قاریشقالارلا چیبینلرله اویناییرام. تهرانین «آزادلیق» بورجوندا قاریشقا بویدا ماشینلاری ساییرام بیر به بیر. سایدیقجا 209 –جو حرفی سیلمک ایستهییرم دیلیمین یارالانمیش سایلاریندان. بیر آیدین شعرچی دئمیشدی هارداسا «سایماق باشارمیرام/ سئومک باشاریرام».
آزادلیقدان باغیریرام دربنده:
«بنؤشه بنده دوشدو...
های-کویو کنده دوشدو
منیم سون بئشیک باجیم
هاردا کمنده دوشدو...»
تهرانین شونیست خیابانلاری نه دوشونور آنا باجی غیرتینی. بوردا ائکسله تیریاکین قوهوملوغو، یالانلا سیاستین سئویشمهسی و آزادلیغین سادهجه بیر مئیدان اولدوغو اؤنملیدیر. و «آذربایجان» بیر داریسقال خیاباندیر کی «جمهوری»یه سؤیکهنیبدیر کورَیی. بورا اورادیرکی، سئچگی عرفهسینده سویوق دَیمهدن ائوده یورغانا بورونمک تکجه سئچهنهییندیر.
بوردا یورغون دمکراتلار اوچون «اِوین»یز وار، ائویمیز یوخدور...
سن عرب دونیاسی ایله تورک دونیاسینی بیرلشدیرن خاتین... فضولی آذربایجانینین «امالملائکه»سیسن. نزار قبانی ایله بختیار واهابزاده، احمد مطرله رامیز روشن سنی سیزیلداییر هر سطیر باشی. به سن مجنونسوز نئجه یاشاییرسان باجیم. مجنون کی چؤللوکلرده دئییل، قونشو سلولدا ایشکنجه اولماقدادی. آسلانلارلا یاشامیر جومرود وورغونلار. ایندی کافتارلارلا اوز به اوزدور مدرنیتهنین مجنونلوغو...
ایندیجه آزادلیق، قاریشقا سایاغی «بهروز»ون اللریندن دیرماشیر گؤزلرینی اؤپسون دئیه. زیندانین قاریشقالاری هر بیر دوستاغا نعمتدیر... ائلهسه یاشاسین قاریشقالار....
ایندیجه «بهروز» قاریشقالار قروپویلا اوخویور لوطفویار ایمانوفون ماهنیلارینی...
قولاق آسین...
لوطفن قولاق آسین رادیو سسینه...
بیری او کؤهنه رادیونون خودونو وئرسین...
د د دم. د د دم. د د دم...
بوراسی زنگان، دانیشیر آذربایجان سسی رادیوسو...
آذربایجان دالغالاریندا سؤزو بهروز صفری جنابلارینا وئریریک:
………………………………………………
لئیلیملئی.....................
لئیلیملئی..........................
لئیلیملئی...................
لئیلیملئی.................
لئیلیملئی..................
لئیلیملئی................
لئیلیملئی..................
لئیلیملئی........................
هرگئجهم اولدو سحر غصه فلاکت سنسیز
هر نفس چکدیم هدر گئتدی، او ساعت سنسیز
سنین اول جلب ائلهین وصلینه آند ایچدیم اینان
هجرینه یاندی کؤنول، یوخ داها طاقت سنسیز
اؤزگه بیر یاری نئجه آختاریم ای نازلی صنم
بیلیرم سندهدی دل، یوخ یارا حاجت سنسیز
سن منیم قلبیمه حاکیم، سنه قول اولدو کؤنول
سن عزیزسن من اوجوز بیر هئچم، آفت سنسیز
سن "نیظامی"دن اگر آرخایین اولساندا گولوم
گئجه گوندوز آراییب اولمادی راحت سنسیز
نظامی گنجوی
فوریه 24, 2007 at 12:51 ق ظ | In آوروپا تورکلری, تورک قادینی |
تورکیه تورکلرینین گلهنگدیر بو… باتییا باخیش و باتییا یؤنهلمه…
بیر زامانلار فاتحلر و قانونیلر چاغیندا قیلینج و توپ-توفنگ گوجو ایله اروپانی سارسیتمیش تورکلر، بوگون ده اروپانین تورکلری ازمک اوچون قوللاندیغی دموکراسی و انسان حاقلاری سلاحی ایله یئنه اروپانی فتح ائدیرلر…
1968ده سیواسدا آنادان اولان نباهت آلبایراق هلند اؤلکهسینین عدلیه باخانی(وزیر دادگستری) اولدو. بو اولایی بوتون تورک دونیاسینا تبریک ائدیرم.
نباهت آلبایراقدان باشقا مراکشلی احمد ابوطالب ایسه، هلند اؤلکهسینین اجتماعی ایشلر باخانلیغینا سئچیلمیشدیر. بو ایکی مسلمانین هر ایکیسینین ده 2 پاسپورتلاری واردیر و ایکی ملیتلی ساییلیرلار. کئفلری اولسون…
قایناقلار:
دو وزير مسلمان در دولت جديد هلند
Row over Dutch Muslim ministers
Two Muslim Ministers in the Netherlands
Netherlands And Turkey
The Wikipedia: Nebahat Albayrak
۱۶ ايل يايينلانماقدا اولان بيرجه قادينلار درگيسي اينتيحارچي قادينلارا تنقيد ائتديگي اوچون قاپاتيلدي.
“اؤلورلر کي اؤلدورسونلر” باشليغييلا ايراندان اولان “اينتيحارچي باجيلار”ا (خواهران استشهادي) گؤره بير يازيدا، بو اينسانلارين باشقالاري نين ياشامينا ضرر وئرديکلري تارتيشيليب. يازي اوچون سئچيلن عکس ايسه آنلامليدير.
ايران يئتکيليلري بو درگيده يايينلانان يازي و اونا گؤره سئچيلن عکسي “توپلوما تهلوکه ياراتماق” و “بسيج قادينلارينا ايهانت ائتمک” آدلانديريب و درگي نين يايينلانماسينا سون قويوبلار.